خالتى بهية و المحافظ

فى احدى قرى المحروسة ذهبت خالتى بهية - تلك الأرملة المسنة التى تعول نصف دستة أينام – بكارتة الخبز الى مخبز عبد العاطى ، و عادت باكية خالية الوفاض تجر أذيال الحسرة ، تلطم الخد ، و تكلم نفسها :
- يا نهار مش فايت هأكلهم طول اليوم ، طوب يا عالم ؟

شعرت بيد حنونة تربت على كتفها ، رفعت وجهها ، فرأته مسئول محترم يتبعه موكب عظيم . يبتسم لها بعطف و يسألها:
- مالك يا خاله ؟
- عبد العاطى يا بنى رفض يدينى العيش و رمى الكرته فى وشى و شدنى من دراعى و رمانى بره الفرن
- بره الفرن ؟معاه حق لأنك ما رحتيش تصرفى من الكشك.
- كشك ايه يا بنى ؟ده من ساعة ما شالوه من عند المجلس المحلى و حطوه قٌدام المخبز وهو فاضى زينه و بيوزعوا العيش من جوا الفرن.
- يبقى جيتى متأخرة ؟
- ليه يا بيه هى الساعة بقت عشرة معاد قفلهم ؟

رد أحد الواقفين بتلقائية بعد أن نظر فى ساعته :
- لسه تمانية و نص .

أردفت بهية :
- شفت يا بنى ؟ و أنا و حياة النبى شايفه العيش المفرود مش المكعبر اللى بخده كل يوم خارج لسه من الباب الورانى لسى عبده بيه ، و بعديها خرج الواد حوده من نفس الباب على كتفه شوال دقيق حطه على عربية نص نقل حمرا مليانه لعينها اشولة دقيق.

زغر المسئول لأحد الأفندية و قال :
- فين رجالتك مفتشين التموين يا مدير ادارة التموين؟

ردت بهية بسرعة وعفوية :
- لسه شيفاه بيسلم على سواق العربية النص نقل الحمرا اللى شايله الدقيق ، و ركب الموتوسيكل اللى جابهوله عبد العاطى محبة و اخوة و طار من قدامى و أنا بانده عليه عشان اشتكى له .

تدخل أحد موظفى المجلس المحلى و قال :
- يا باشا كنا بنحط موظف فى الكشك يراقب عبد العاطى و يناهده فيصدع دماغ المواطن . فشلنا الكشك و اديناه لعبد العاطى و شلنا منه الموظف.. و ريحنا المواطن .
ثم اردف باستعطاف:
- بعد اذنك يا باشا انا هحل لخلتى بهية مشكلتها . تعالى معاياى يا خالة .

ذهبت بهية مع مسئول الوحدة المحلية لمنزله ، ثم عادت بطاولة من الخبز الساخن المفرود على رأسها . و مالت على يد الباشا تقبلها و هى تسأله :
- انت مين يا بنى ربنا يخليك و يعلى مراتبك؟
فرد أحد الأعوان بحزم :
- ده سيادة المحافظ يا ست انتى ما بتشوفيش ؟
ردت بهية بامتنان و الدمع يملأ عينيها:
- هتيجى يا بنى بكره امتى عشان آخد العيش ؟

ضحك السيد المحافظ برضا و استمر فى جولته يتفقد أحوال المواطنين . و غطى صوت المذياع المنبعث من المقهى على تساؤل بهية و ضحكات المحافظ :
مصر يا مه يا بهية
يا أم طرحه و جلبيه ...................
...........................
فلاحينيك ملاحينيك
يزعقوا للريح يواتي.............
.....................................................

موضوع مميز
ومنور المنتدى مرة اخرى
استاذى الفاضل

الله يكون في عون الناس كلهم مش خالتي بهيه وبس وربنا يستر علينا

العيش بقى عملة نادرة طبعا أقصدعيش الغلابة والمحافظ لاهيدى خالتى بهيه ولاغيره وربنا يستر

خالتى بهية و المحافظ

خالتى بهية و المحافظ

مواضيع مماثلة

مواضيع مماثلة